Գլխավոր | Բլոգ | Լրահոս | Աստվածաշունչը երիտասարդներին

Այս ծրագրի շրջանակներում հանդիպում են երիտասարդաց միության անդամները, համալսարանների և քոլեջների ուսանողները՝ կիսելու Աստծո խոսքը։ Վերջին տարիների ընթացքում ՀԱԸ հաճախ խնդրանքներ է ստացել այդ խմբերից հանդիպումներ անցկացնելու իրենց հետ, որպեսզի կարողանան ստանալ իրենց հուզող հարցերի պատասխանները։

2011 թ. մենք մի նոր ծրագիր նախաձեռնեցինք՝ նպատակ ունենալով պատրաստել երիտասարդ առաջնորդներ։ ՀԱԸ այժմ կազմակերպել է Աստվածաշնչի սերտողություններ, դասախոսություններ՝ նախատեսված հատուկ ուսանողների համար՝ նրանց հետաքրքրող և նրանց համար կարևորություն ներկայացնող թեմաներով։

2011 թ. մարտ-մայիս ամիսներին ծրագիրն իրականացվեց 3 խմբերի համար՝ համալսարանական ուսանողներ, երիտասարդաց միության անդամներ և ԵՊՀ Աստվածաբանական ֆակուլտետի մագիստրատուրայի լավագույն ուսանողներ (յուրաքանչյուր խմբում 22-25 հոգի)։

Այս ժամանակահատվածում 4 ժամ տևողությամբ 10 սեմինարներ են հատկացվել յուրաքանչյուր խմբին։ Դասախոսները Մայր Աթոռ Ս. Էջմիածնի միաբաններ էին, դասախոսներ ԵՊՀ-ից և ՀԱԸ-ից։
72 Աստվածաշունչ, 353 Նոր Կտակարան և 3,133 օրինակ աստվածաշնչային գրականություն է բաշխվել մասնակիցներին։

Նաև ամենամսյա հանդիպումներ են տեղի ունեցել Երևանի Սուրբ Երրորդություն Եկեղեցու 150 երիտասարդների հետ՝ ներառյալ 25-30 խուլ ու համր երիտասադրներ։

Այս ուսումնական տարվա ավարտին ՀԱԸ հատուկ դասընթաց կազմակերպեց Գևորգյան Հոգևոր Ճեմարանի մագիստրատուրայի ուսանողության համար՝ ՙԱստվածաշունչը՝ որպես մեր ծառայության հիմք՚ թեմայով։ Հանդիպմանը նաև ներկա էր Գևորգյան Հոգևոր Ճեմարանի տեսուչ Հոգեշնորհ Գևորգ վրդ. Սարոյանը, որը նաև ՀԱԸ Հոգաբարձուների խորհրդի ատենապետն է։ ՀԱԸ գրաբար Աստվածաշունչ և 12 անուն աստվածաշնչային գրականություն բաշխեց մագիստրատուրայի 47 ուսանողներին։ Նույն ծրագիրը նախատեսված է նաև Հայ Ավետարանական Եկեղեցու Աստվածաբանական Ակադեմիայի ուսանողության համար սույն թվականի սեպտեմբերին։