«Հոգետրավմայի ամոքում» ծրագիրը ՀՀ-ում իրականացվում է 2020թ․-ից։ 2021-2022թթ․ այս ծրագրի շրջանակում ՀՀ հանրակրթական դպրոցների Հայ Եկեղեցու Պատմություն առարկայի ուսուցիչների համար կազմակերպվում են քառօրյա վերապատրաստման դասընթացներ անորոշ ժամանակներում ապրող դեռահասների հոգետրավմաների ամոքման թեմայով։ Դասընթացին ցանկալի է դպրոցների հոգեբանների մասնակցությունը։
Ծրագիրն ունի երկու թեմատիկ ուղեցույցներ՝ «Ազատագրում» և «Աղետից Անդին», որոնք պատրաստված են բնական աղետ, պատերազմ, համաճարակ ապրած դեռահասներին հոգևոր-հոգեբանական առաջին օգնություն ցուցաբերելու նպատակով։ Ծրագիրը դրական ազդեցություն ունի դպրոցներում դեռահասների խնդիրների վեր հանման, դրանց ճիշտ և գրագետ լուծման, հույզերի արտահայտման ու վերահսկման, ինչպես նաև սթրեսի հաղթահարման վրա։
Հոգևոր առաջին օգնությունը մարդկանց ընդառաջում է ճանաչելու ընդհանուր հոգևոր և զգայական ռեակցիաները աղետներին: Ինչպես ֆիզիկական առաջին օգնությունը, սա ևս միտված է սկսելու խնամքի շարունակական գործընթաց: Այս ուղեցույցները կարող են մարդկանց տալ հմտություններ և ռեսուրսներ, որոնք կնպաստեն ամոքմանն ու վերականգնմանը: Ուղեցույցներում օգտագործվել են մեթոդներ և վարժություններ՝ մշակված Հոգետրավմայի ամոքման ինստիտուտի ծրագրի օրինակով:
Վերապատրաստման դասընթացը վարում են հոգեբանը և հոգևորականը, որոնք իրենց մասնագիտական մոտեցումների հիման վրա, միմյանց լրացնելով, համակողմանի կերպով ուսուցիչներին տալիս են նոր գիտելիքներ և հմտություններ՝ իրենց դասարաններում հոգետրավմաներ ունեցող դեռահասներին հայտնաբերելու, պատշաճ օգնություն ցուցաբերելու, իսկ անհրաժեշտության դեպքում նեղ մասնագետի մոտ ուղղորդելու համար։
Դասընթացի հոգևոր մասը իրականացվում է բացառապես Աստվածաշնչի հիման վրա՝ հոգեբանական կոնկրետ խնդիրները աստվածաշնչային օրինակներով լուսաբանելով։
Դասընթացին զուգահեռ վերապատրաստվող ուսուցիչները վերոնշյալ ուղեցույցներով աշխատում են իրենց աշակերտների հետ, ապա ստացված արձագանքներն ու արդյունքները քննարկում դասնթացավարների հետ։
Դասընթացի մասնակիցներին տրվում են հավաստագրեր ՀԱԸ-ի կողմից։
