2018 Սեպ 27, ՀինգշաբթիՍեպտեմբերի 27-ին Երևանի Հովհ. Թումանյանի անվան պետական տիկնիկային թատրոնում տեղի ունեցավ Ղուկասի Ավետարանը ժեստերի լեզվով տեսասկավառակի շնորհանդեսը, որը մեկնարկեց Միացյալ Աստվածաշնչային Ընկերությունների գլոբալ խորհրդի անդամ Կարդինալ Ջոն Օնայեկանի (Աբուջայի Կաթոլիկ թեմ) կողմից Տերունական աղոթքով:
Սկավառակը Հայաստանի Աստվածաշնչային Ընկերության (ՀԱԸ) և Արարատյան Հայրապետական թեﬕ համատեղ ջանքերի արգասիքն է՝ հովանավորությամբ Ամերիկյան Աստվածաշնչային Ընկերության:
Պատմությունները ներկայացնում են խուլերի համայնքի անդամները, որոնց մեծապես օգնել են ժեստերի լեզվի մասնագետ Գոհար Մելիքյանը և Տ. Եսայի քահանա Արթենյանը:
Տ. Եսային անդրադարձավ խուլերի համայնքին նվիրված ծառայության և ՀԱԸ-ի հետ համագործակցության 14 տարվա պատմությանը:
Այնուհետև համայնքի անդամները մնջախաղով ներկայացրին Ղուկասի Ավետարանը՝ Հիսուսի ծննդից մինչև հարություն: Հանդիսության վերջում բաժանվեցին տեսասկավառակները:
Միջոցառմանը ներկա էին ՀԱԸ աշխատակազմը՝ գլխավորությամբ գլխավոր քարտուղար Գերաշնորհ Տ. Եզնիկ արք. Պետրոսյանի, Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանը, ՀՀ կրթության և գիտության նախարարի տեղակալ Հովհաննես Հովհաննիսյանը, Արևելյան Ուղղափառ Եկեղեցու, Հին Արևելյան Ուղղափառ Եկեղեցիների և Միացյալ Աստվածաշնչային Ընկերությունների բարձրաստիճան ներկայացուցիչներ, Լսողության խանգարումներ ունեցող երեխաների հատուկ կրթահամալիրի տնօրեն Աշոտ Ավետիսյանը և այլք:
Նավասարդ Սրբազանն իր խոսքում ասաց. «Բազմախոս այս լսարանում իմ առջև բացվեց Բաբելոնի աշտարակաշինության պատմությունը, որտեղ բազմալեզու մարդիկ չկարողացան իրար հասկանալ: Իսկ այսօր այստեղ մեր բազմախոսությամբ իրար հասկացանք, որովհետև խոսում էինք մեկ լեզվով՝ Աստծո լեզվով»:
Միացյալ Աստվածաշնչային Ընկերությունների գլխավոր տնօրեն Մայքլ Պերուն բարձր գնահատեց այս մեծ գործը, որը միտված է Աստծու խոսքը հասանելի դարձնելու բոլորին անխտիր: