2018 Փետ 20, ԵրեքշաբթիՀԱԸ-ն միշտ եղել է ու լինելու է հայրենիքի պաշտպան հայ զինվորի կողքին՝ զորամասերում, խրամատներում, ամեն տեղ, որտեղ նա ներկա է: Ս.թ. փետրվարի 20-ին ՀԱԸ-ի ծրագրերի տնօրենը գնդերեց Տ. Սամվել քահանա Սարգսյանի հետ այցելեց Երևանի առաջին հիվանդանոցում գտնվող նորաբաց վերականգնողական կենտրոն՝ ՀԱԸ-ի կողմից Կենտրոնին նվիրելով Աստվածաշունչ և այլ հինգ անուն աստվածաշնչյան գիրք: ՀԱԸ-ի ծրագրերի տնօրենը հանդիպեց ամենատարբեր վնասվածքներ ունեցող զինվորների հետ, որոնք բժիշկների խնամքով վերականգնողական բուժումներ էին ստանում: Նա զրուցեց յուրաքանչյուր զինվորի հետ և նրանց նվիրեց Ղուկասի Ավետարանը՝ իրենց հոգևոր պարապմունքի համար: Երիտասարդ զինվոր Արտակին բուժում էր ծնունդով Չորաթանից մի բժշկուհի՝ Էլեանորան, որը տարիներ առաջ գյուղում մասնակցել էր «Քայլող Ավետարան» ծրագրին: Զրույցի պահին ծրագրերի տնօրենը նշեց. «Բուժման համար հիմնական երեք պայմաններ կան. այս բժշկուհու հպումը, մարդկային զրույցը և ժպիտը»: Ուրախացուցիչ էր լսել Արտակի անմիջական ու արագ պատասխանը. «Ամենակարևորը՝ ՀԱՎԱՏՔԸ»:
Երբեմն չարժե խոսել հավատքի մասին, այլ այս մասին լսել ուրիշներից…
