2013 Դեկ 20, ՈւրբաթՀայաստանի Աստվածաշնչային Ընկերության (ՀԱԸ) համար ուրախության առիթ էր ուրբաթ՝ դեկտեմբերի 20-ին, Աշտարակ քաղաքի կույրերի հետ հանդիպումը: Առիթը նոր թողարկված խոշորագիր Ղուկասի Ավետարանի, բրայլյան Հիսուսի պատմությունները և Հին Կտակարանյան պատմություններ գրքերի բաշխումն էր համայնքում ապրող կույրերին և թույլ տեսողություն ունեցող մարդկանց: Հանդիպումը սկսվեց Սբ. Մարինե եկեղեցու հովիվ Տ. Մկրտիչ քհն. Երանյանի աղոթքով և խոսքով: Տեր հայրը կարևորեց Աստվածաշնչյան գրքերի ընթերցումը՝ մասնավորապես նշելով. «Գիրք ունենալը մի բան է, այն կարդալը այլ բան: Սույն գրքերը ձեզ են տրվում մշտապես ընթերցվելու համար»: ՀԱԸ ծրագրերի տնօրեն Ա. Գաբուճյանը, ծանոթ լինելով այս համայնքի անդամներին, իր ուրախությունը հայտնեց նախատոնական այս հանդիպման համար և խոշորագիր Ղուկասի Ավետարանի մի օրինակ հանձնեց անդամներից մեկին՝ ընթերցելու: Պատահական բացված էջում հետևյալ տողերը ընթերցվեցին. «Երանի՜ այն աչքերին, որ տեսնում են այն, ինչ դուք եք տեսնում։ Ասում եմ ձեզ, որ շատ մարգարեներ և թագավորներ ցանկացան տեսնել ձեր տեսածները, բայց չտեսան, և լսել ձեր լսածները, բայց չլսեցին» (Ղկ. 10.23): Այստեղից էլ Ա. Գաբուճյանը կառուցեց իր մտածումները՝ ասելով. «Մեզնից ոչ ոք կատարյալ չէ. Ավետարանը հորդորում է դառնալ ձեռք՝ ձեռք չունեցողին, քայլ՝ կաղերին, լսողություն՝ խուլերին, տեսողություն՝ կույրերին, որպեսզի հասնենք միասնական կատարելության: Բայց ամենամեծ անկատարությունը Աստվածաշնչից հեռու մնալն է: Թող Աստծո խոսքը լույս լինի բոլորիս ճանապարհին»:
Համայնքի ղեկավարը վերջում իր շնորհակալությունը հայտնեց քահանային և ՀԱԸ այս գեղեցիկ նվերների համար և ասաց. «Աստվածաշունչը էական է բոլորիս համար՝ և՛ հիվանդի, և՛ առողջի, և՛ հաշմանդամի, և՛ կույրի, բոլորի համար անխտիր»:
Միջոցառման ավարտին յուրաքանչյուրն ուրախությամբ ստացավ իր նվերը: