2013 Նոյ 27, ՉորեքշաբթիԱստվածաշունչը սերտելու և հոգևոր ընթերցանությանը հայ զինվորին հասու դարձնելու նպատակով Հայաստանի աստվածաշնչային ընկերության նախաձեռնությամբ Հայոց բանակում իրականացվում է զինվորներին Աստվածաշունչ մատյաններ բաժանելու գործընթացը: Ծրագրի շրջանակում սույն թվականի նոյեմբերի 26-ին Պաշտպանության նախարարության մոտոհրաձգային զորամասերից մեկի սպայական անձնակազմին ու զինվորներին տրամադրվեց 600 օրինակ «Աստվածաշնչի պատգամը. Աստվածաշնչային ընթերցումներ զինվորի համար» ծաղկաքաղ Աստվածաշունչ գիրքը (Բ. հրատարակություն): Միջոցառումը, որը տեղի ունեցավ զորամասի շարահրապարակում, սկսվեց Գարեգին Բ. Ամենայն Հայոց Հայրապետի Օրհնության գրով, որն ընթերցեց զորամասի հոգևոր սպասավոր Հովհաննես սարկավագ Աղաջանյանը: ՀՀ ԶՈՒ Հոգևոր փոխառաջնորդ Մովսես աբեղա Սարգսյանը ներկայացրեց Սուրբ Գրքի նշանակությունը յուրաքանչյուրի կյանքում, մասնավորպես նշելով. «Քրիստոսի եկեղեցին իր հիմնադրման առաջին օրերից առաջնային է համարել Աստվածաշունչ գրքերի ընթերցանությունը՝ որպես հավատացյալ մարդու սրտում Աստծո պատգամների սերմնացանքի, որի պտուղները հոգևոր օրհնությունն է, որ մենք վայելում ենք իբրև Տիրոջից եկած պարգև: Քրիստոսի զինվորը լինելու, Նրա պատգամներին հետևելու և մանավանդ դրանք պաշտպանելու համար Աստվածաշունչը մեծագույն շնորհն է, "Աստծու զորությունն է՝ ի փրկություն բոլոր հավատացյալների"/Հռոմ. 1.16/»: Աստվածաշնչային ընկերության կողմից հոգևոր զորակցության և քաջալերանքի խոսքով հանդես եկավ Հայաստանի աստվածաշնչային ընկերության ծրագրերի տնօրեն Արշավիր Գաբուճյանը:
Միջոցառման ավարտին զորամասի և զինվորների անունից ՀԴՆ հրամանատարի տեղակալ Նարեկ Ղամբարյանը շնորհակալություն հայտնեց կազմակերպիչներին և վստահեցրեց, որ Սուրբ Գրքի սերտողությունը լինելու է հոգևոր սպառազինություն և նպաստելու է հայ զինվորի բարոյահոգեբանական վիճակի բարելավմանը, օգնելու է ամուր կանգնելու հայրենիքի պաշտպանության դիրքերում: