2013 Սեպ 30, ԵրկուշաբթիՀայաստանի Աստվածաշնչային ընկերության նախաձեռնությամբ լույս տեսավ առաջին խոշորագիր Ղուկասի Ավետարանը: Ծրագրին իր աջակցությունը հայտնեց Գերմանիայի Աստվածաշնչային ընկերությունը:
«Սա բնականաբար ուրախություն է մեր ընկերության համար,- ասաց ծրագրերի տնօրեն Ա. Գաբուճյանը,- առաջին անգամ է հրատարակվում նման ձևաչափի գիրք, բայց մեր ուրախությունը բազմապատկվում է, երբ գտնում ենք հասցեատիրոջը: Տարիներ շարունակ հրատարակել ենք Բրայլյան տարբերակը՝ մոռանալով տեսողության այլ խանգարում ունեցողներին. այժմ արդեն նաև նրանց ենք ձեռք մեկնում»:
Գրքերի խմբաքանակը ստանալուց անմիջապես հետո ընկերությունն այցելեց Երևանի թիվ 14 դպրոց, որտեղ անցկացվում էր միջոցառում Հայաստանի կամավորների ջոկատի անդամների մասնակցությամբ: Ներկա էին նաև նույնանուն միջազգային կազմակերպության ներկայացուցիչներ Գերմանիայից և Ճապոնիայից, ինչը կարելի է գեղեցիկ զուգադիպություն համարել. Հայաստանի Աստվածաշնչային ընկերությանն աջակցում է Գերմանիայի Աստվածաշնչային ընկերությունը, իսկ Գերմանիայից ժամանած Ջուլյա Բլախը մեկ տարի իբրև կամավոր ծառայելու է այս դպրոցում:
Հուզիչ պահ էր, երբ «Իմ փոքրիկ նավակ» երգի ներքո ջոկատի ներկայացուցիչները պատրաստեցին «թղթե նավակներ» և հանձնեցին աշակերտներին: Հանդիսության վերջում ընկերության ծրագրերի տնօրենը աշակերտներին նվիրեց իսկական նավակներ՝ Աստծո խոսքի գիրքը: