2013 Օգս 22, ՀինգշաբթիԵրկու հաջորդական շաբաթ Հայաստանի աստվածաշնչային ընկերության Գլխավոր քարտուղար Եզնիկ արք. Պետրոսյանն ու ծրագրերի տնօրեն Արշավիր Գաբուճյանը եղան Տավուշում: Օգոստոսի 10-ին Մովսես գյուղի ավանդական տոնն էր: «Քայլող Ավետարան» ծրագրի ջատագով՝ Բերդի տարածաշրջանի հովիվ Տ. Արամ քհն. Միրզոյանի ցանկությունն էր, որ ընկերությունը մասնակցի տոնին: Այս առիթով գյուղ էր այցելել նաև ՀՀ Պաշտպանության նախարար պարոն Սեյրան Օհանյանը: Տոնակատարությունը սկսվեց սահմանամերձ գյուղի նորակառույց եկեղեցու ղողանջներով ու մոմավառությամբ: Տավուշի թեմի առաջնորդ Եզնիկ արք. Պետրոսյանը եկեղեցում ողջունեց նախարարին և պետական այրերին՝ իր խոսքում կարևորելով Հայ եկեղեցու և բանակի անքակտելի կապի անհրաժեշտությունը և դրանց դերակատարությունը մեր ժողովրդի պահպանության և պաշտպանության ի խնդիր:
Սրբազանն իր խոսքի ավարտին նախարարին նվիրեց ՀԱԸ հրատարակած «Աստվածաշնչի պատգամը զինվորի համար» ծաղկաքաղ Աստվածաշունչ:
Հաջորդ օրը՝ կիրակի, գյուղի եկեղեցու օծման երկրորդ տարեդարձն էր: Բազմամարդ եկեղեցում տեղի ունեցավ հանդիսավոր Սբ. Պատարագ: Պատարագը իբրև ուխտավոր մատուցեց և քարոզեց Մայր Աթոռ Սբ. Էջմիածնի փոխդիվանապետ Տ. Պարույր քհն. Ավետիսյանը: Պատարագից հետո ներկաները վայելեցին գյուղի կիրակնօրյա դպրոցի աշակերտների ձեռքի աշխատանքները: Կիրակնօրյայի հիմնադրությունը Տեր Արամի ջանքերով կարելի է համարել «Քայլող Ավետարան» ծրագրի ամենագեղեցիկ շարունակություն: