2013 Մայ 30, ՀինգշաբթիԱյգեպար և Այգեձոր
Ս.թ. մարտ ամսին մեկնարկած «Քայլող Ավետարան» ծրագիրն իր միջնամասում արժևորվեց հիշարժան երկու իրադարձություններով:
Տավուշի մարզի Այգեպար և Այգեձոր սահմանամերձ գյուղերը Սբ. Զատիկը համայնաբար նշեցին` կազմակերպելով զատկական տնօրհնեքի արարողությունը գյուղի դպրոցներում: Տարածաշրջանի հոգևոր հովիվ Տ. Արամ քհն. Միրզոյանը օրհնեց աղը, հացն ու ջուրը` մեկ անգամ ևս ավետելով Քրիստոսի հրաշափառ Հարությունը:
Հատկանշական էր Այգեձորում կատարված արարողությունը. դպրոցի բակում տեղադրվել էին 12 սեղաններ: Սա յուրաքանչյուր դասարանի ցանկությունն էր, որ ամեն դասարան ունենար իր օրհնված հացը, աղն ու ջուրը: Արարողությունից հետո համախմբված բնակչությունը՝ ծնողներ, ուսուցիչներ, աշակերտներ, հերթով մոտեցան սեղաններին` ճաշակելու աղն ու հացը և խմելու օրհնված ջրից: Համարյա բոլորն էլ իրենց բաժին օրհնությունը տարան իրենց տները:
Ծափաթաղ
Գեղարքունիքի մարզի Ծափաթաղ գյուղի բնակիչները Ցեղասպանության զոհերի հիշատակի հանդիսությունը ցանկացել էին ոգեկոչել ՀԱԸ այցի օրը, հինգշաբթի ապրիլի 26-ին:
Գյուղացիները հավաքվել էին դպրոցի ամենամեծ դասարաններից մեկում: Այնտեղ մի անկյունում տեղադրվել էր Ծիծեռնակաբերդի հուշակոթողի մանրակերտը` անմար կրակը խորհրդանշող փայլփլող մոմով: Գյուղացիները մեծից մինչև փոքր մոտեցան և մոմեր վառեցին հուշակոթողի մանրակերտի առաջ: Մոմավառությունից հետո դպրոցի բոլոր աշակերտները խմբային արտասանությամբ ներկայացրին Հայոց եղեռնը՝ Պարույր Սևակի «Անլռելի զանգակատուն» պոեմի կառույցով, վերջում պատգամելով հայ ժողովրդի հարությունը: Հանդիսությունը փակվեց տարածաշրջանի հովիվ Տ. Մեսրոպ քհն. Երիցյանի խոսքով և աղոթքով: