2013 Ապր 16, ԵրեքշաբթիՍ.թ. մարտ ամսին մեկնարկեց «Քայլող Ավետարան» ծրագիրը: Այս կիսամյակի համար ծրագրում ընդգրկվել են Գեղարքունիքի մարզի Ջիլ և Ծափաթաղ, Տավուշի մարզի Այգեպար և Այգեձոր սահմանամերձ գյուղերը: Գոտեպնդող է այն, որ նշյալ գյուղերի բնակիչները՝ ծնողներ, ուսուցիչներ, աշակերտներ, կանոնավոր կերպով մասնակցում են ՀԱԸ կազմակերպած հանդիպումներին: Այդ շրջանների հոգևոր հովիվները՝ Տ. Մեսրոպ և Տ. Արամ քահանաները, ընկերության ծրագրերի տնօրեն Ա. Գաբուճյանի հետ միասին գյուղաբնակչությանը բացատրում են Աստծո խոսքը և ներկայացնում քրիստոնեական եկեղեցու հիմնարար սկզբունքները:
Ս.թ. ապրիլի 14-ին գեղեցիկ զուգադիպությամբ ընկերության ծրագրերի տնօրենը Տ. Արամ քհն. Միրզոյանի հրավերով մասնակցեց Բերդի եկեղեցու կառուցման մեկամյակին նվիրված միջոցառմանը: Ընկերության անունից շնորհակալություն հայտնելով Բերդի քաղաքապետին՝ Ա. Գաբուճյանը կապալառուին և շինարարներին բաժանեց «Աստծո պատգամը» գիրքը՝ որպես Աստծո խոսքի մշտական ներկայություն նրանց առօրյա կյանքում և եկեղեցաշինության այս կարևոր գործում: