2013 Փետ 22, ՈւրբաթՍ.թ. փետրվարի 22-ին ՀՀ ԶՈՒ Հոգևոր առաջնորդի տեղակալ Տ. Մովսես աբղ. Սարգսյանն ու ՀԱԸ ծրագրերի տնօրեն Ա. Գաբուճյանը այցելեցին զինվորական հիվանդանոց, որտեղ նրանց դիմավորեցին Գնդապետ Արամ Ասատուրյանը և Հոգևոր հովիվ Տ. Դավիթ քհն. Շախկյանը: Հայր սուրբն ու Ա. Գաբուճյանը հնարավորություն ունեցան այցելելու վիրավոր և հիվանդ զինվորներին իրենց հիվանդասենյակներում և յուրաքանչյուրին նվիրեցին ՀԱԸ հրատարակած <Աստվածաշնչային ընթերցումներ զինվորի համար> գիրքը: Բաժինների բժիշկներն իրենց ուրախությունն ու գոհունակությունը հայտնեցին՝ նշելով, որ խնամվող զինվորները բուժանձնակազմից հաճախ են պահանջում մի բան ընթերցել: <Սա լավագույն նվերն է մեր հիվանդանոցին, բայց հատկապես մեր զինվորներին,- ասաց բժիշկներից մեկը,- ոչ որովհետև ընթերցանության համար գրականություն եք բերել, այլ Ս. Գիրքն եք հանձնում մեր հիվանդներին>: Այցելությունն ուղեկցվեց նաև հոգևորականների աղոթքով:
Հիվանդներին այցելելուց հետո Հայր սուրբը, Տ. Դավիթն ու Ա. Գաբուճյանը հանդիպեցին հիվանդանոցի բարձրաստիճան սպաներին և բուժանձնակազմին: Հանդիպումը սկսվեց Տերունական աղոթքով: Ապա ընթերցվեց Վեհափառ Հայրապետի օրհնության գիրը: Ներկաներին ուղղված խոսքով հանդես եկավ նաև Ա. Գաբուճանը, որը հանգամանալից ներկայացրեց սույն հրատարակության դրդապատճառներն ու նպատակը և կոչ արեց ներկաներին Ս. Գիրքը դարձնել ամենօրյա ընթերցանության առարկա:
Սույն գրքի բաշխմանը նվիրված միջոցառումը նախատեսվածից ավելի երկար տևեց և վերածվեց սեմինարի, որովհետև կային բազմաթիվ հարցեր, որոնք լուաբանման կարիք ունեին: Նկատի ունենալով հարցերի երկար շարանը՝ Տ. Դավիթը ՀԱԸ ծրագրերի տնօրենին հրավիրեց մեկ այլ առիթով ևս կամ պարբերաբար հանդիպելու բուժանձնակազմի հետ և զրուցելու աստվածաշնչական թեմաներով: Միջոցառումը եզրափակեց Գնդապետ Ասատուրյանը, որը նախ իր շնորհակալությունը հայտնեց ՀԱԸ-ին այս գեղեցիկ նվերի համար: Նա իր գոհունակությունը հայտնեց զորանոցներում հայ հոգևորականների գործունեության, իսկ այժմ՝ Ս. Գրքի ներկայության համար: