2013 Փետ 04, ԵրկուշաբթիԻսֆահանի թեմի առաջնորդ Տ. Բաբկեն եպս. Չարյանի հրավերով ՀԱԸ ծրագրերի տնօրեն Արշավիր Գբաուճյանը մեկնեց Իսֆահան՝ մասնակցելու Կրոնների երկխոսության միջազգային Բ. Համաժողովին, որին մասնակցում էին քրիստոնեական, իսլամական, հրեաական և զրադաշտական կրոնների ներկայացուցիչներ: Համաժողովը նվիրված էր «Աշխատանք և արդյունաբերություն» թեմային:
Միջոցառմանը մասնակցում էին շուրջ 300 ներկայացուցիչներ: Ներկա էին Իսֆահանի նահանգապետ Դոկտ. Ալիռեզա Զաքեր Իսֆահանին, Բաբկեն եպս. Չարյանը, Կրոնների երկխոսության Իսֆահանի գրասենյակի տնօրեն Դոկտ. Հաբիբ Ռեզա Արզանին, կրոնապետեր, համայնքապետեր, պատմաբաններ և հայ համայնքից շուրջ երկու տասնյակ թեմական, կրոնական և կրթական հայ ներկայացուցիչներ:
Գլխավոր թեմայի քրիստոնեական տեսակետները ներկայացրեց Ա. Գաբուճյանը «Տնտեսության բարոյականությունը» խորագրով: Նա իր նյութը կառուցեց՝ հիմնվելով աստվածաշնչական իմաստության և պատգամի վրա, որի հիմքը բարոյականությունն է քաղաքական, մշակութային և տնտեսական բնագավառներում: Անդրադարձ կատարելով համաշխարհային տնտեսական տագնապի ազդեցություններին, ագահության և եսապաշտական երևույթներին՝ Ա. Գաբուճյանը շեշտեց բարոյականության կարևորությունը՝ իբրև հասարակական, բնապահպանական, տնտեսական հարցերի բարի լուծման բանալի, և եզրակացրեց. «Անհրաժեշտ է, որ տնտեսական զարգացման և հարստության մասին մեր տեսակետները ներառեն փոխհարաբերություն և հոգատարություն, զորակցություն և սեր, կյանքի գեղագիտական և բարոյագիտական մոտեցումներ, մասնակցություն և ներգրավվածություն, մշակութային բազմազանություն և երկխոսություն: Այս բոլորի հիմքում միայն կարելի է մարդկային պատասխանատվությամբ կանգնել և նայել արարչությանն ու գալիք սերունդներին և ստեղծել մի տնտեսություն, որը փառաբանելու է կյանքը»:
Համագումարից հետո ծրագրերի տնօրենը կրոնական ներկայացուցիչների հետ նահանգապետարանում հանդիպեց Իսֆահանի նահանգապետին: Սույն այցին ներկա էին նաև Բաբկեն Սրբազանը, Դոկտ. Հաբիբ Ռեզա Արզանին և թեմական ներկայացուցիչներ:
Համագումարի շրջանակներից դուրս Ա. Գաբուճյանը այցելեց Նոր Ջուղայում գործող հայկական դպրոցներ, կիրակնօրյա վարժարան և հանդիպումներ ունեցավ թեմական, կրոնական ժողովների և քրիստոնեական խորհրդի ներկայացուցիչների հետ: