2013 Հուն 13, ԿիրակիՀիսուս Քրիստոսի Անվանակոչության տոնին՝ 2013թ. հունվարի 13-ին Բալահովիտի զորամասում ՀՀ ԶՈՒ հոգևոր առաջնորդ՝ Տ. Վրթանես եպս. Աբրահամյանի հանդիսապետությամբ և զորամասի հրամանատարի խաչքավորությամբ կատարվեց ջրօրհնեքի արարղություն: Արարողությանը մասնակցում էին Հոգևոր առաջնորդի տեղակալ՝ Տ. Մովսես աբղ. Սարգսայնը, Տ. Ենոք քհն. Եսայանը, զորանոցի հովիվ՝ Կարեն սարկավագ Թորոսյանը, Առնակ սարկավագ Տերտերյանը և ՀԱԸ ծրագրերի տնօրեն՝ Արշավիր Գաբուճյանը:
Սրբազան հայրը ներկայացրեց մեր Տիրոջ՝ Հիսուս Քրիստոսի Սուրբ Ծննդյան, ինչպես նաև անվանակոչության տոների խորհուրդները, շեշտելով. ՚Մեր մանկությունից մենք հավատացել ենք հրաշքներին և երբեք չենք հարցրել հրաշքի չափի, քանակի կամ ում կողմից տրված լինելու հանգամանքների մասին. Բայց աշխարհի ամենամեծ հրաշքը Աստծո մարդեղությունն է, մեր Տիրոջ Հիսուս Քրիստոսի Սբ Ծնունդը: Այս հրաշալի տոների կապակցությամբ Հայաստանի աստվածաշնչային ընկերությունը այսօր, այստեղ ներկա է կարևոր նվերով՚: Արարողությունից հետո Հայր Մովսեսը ընթերցեց Ամենայն Հայոց հայրապետի օրհնության գիրը՝ «Աստվածաշնչային ընթերցումներ զինվորի համար» գրքի հրատարակության առիթով:
Այնուհետև օրհնվեց ջուրը և բաժանվեց զինվորներին՝ որպես հոգու և մարմնի բոլոր ախտերի բուժիչ ու մաքրիչ: Վերջում սպաներին և զինվորներին բաժանվեցին Հայաստանի աստվածաշնչային ընկերության կողմից հրատարակված <Աստվածաշնչային ընթերցումներ գրքից> 550 օրինակ: Այդ ամենից հետո զինվորների աչքերում նկատվեց հետաքրքրության և գոհունակության փայլ: Աստվածաշունչը ունենալով իրենց ձեռքին՝ անհագ հետաքրքրությամբ նայում էին նրա կազմին և անհամբերությամբ սպասում այն վայրկյաններին, թե երբ պիտի բացեն այն և հաղորդակցվեն Արարչի պատգամների հետ: Այդ ամենը մեզ ակամայից հիշեցնում է մեր մանկությունը, երբ այս օրերին արթնանում ենք ու հետաքրքությամբ նայում տոնածառի տակ դրված ամանորյա նվերին:
Շնորհակալ ենք Տեր Աստծուց, որ մայրական ջերմությունից ու հայրական խորհուրդներից հեռու գտնվող զինվորների սրտերը լցրեց աղոթքի ջերմությամբ և մտքերը՝ աստվածաշնչյան պատգամներով: