Գլխավոր | Բլոգ | Լրահոս | Ցանկությունս է ունենալ նաև ամբողջական Աստվածաշունչը

Բարև Ձեզ, հարգարժան պարոն Գաբուճյան:
Իմ մեծագույն շնորհակալությունն եմ հայտնում Ձեզ, Աստվածաշնչային ընկերությանն ու բոլոր նրանց, ում միջոցով այս Սուրբ Գիրքը հասավ ինձ: Թող Աստծու օրհնությունը, օգնությունն ու առաջնորդությունը լինեն ձեզ հետ:

Ես Սիրան Աթաբեկյանն եմ՝ ծնված 1967 թ.: Մկրտվել եմ փոքր հասակում: 2005 թ. Աստծու կանչով, մեղքերի խոր գիտակցումով ու զղջումով, խոստովանելու և հաղորդվելու ցանկությամբ գնացի եկեղեցի: Դրան մեծապես նպաստեցին այն հաղորդումները, որ լսում էի ռադիո «Վեմ»-ով: Այժմ էլ այդ ալիքի մշտական ունկնդիր եմ: Եվ մեծ շնորհակալություն նաև Տեր Մեսրոպ Ադամյանին, այդ ռադիոալիքի բոլոր աշխատակիցներին ու բոլոր հովանավորներին: Թող Աստծու Աջը միշտ հովանի լինի նրանց:
Առաջին հաղորդությունս ստացա Մեծ Պահքի Ավագ Հինգշաբթի օրը՝ մարտի 24-ին, Աբովյան քաղաքի Սուրբ Ստեփանոս եկեղեցում, որից հետո իմ կյանքն իմանալիորեն փոխվեց մեծ շրջադարձով: Իսկ Աշտարակ քաղաքում առաջին անգամ պատարագի խորհրդին մասնակից եղա հունիսի 5-ին՝ Սուրբ Մարիամե եկեղեցում, որի հոտի անդամն եմ այժմ:
Շատ կարճ ժամանակում իմ կյանքը հիմնովին փոխվեց. ես բնակարան ունեցա և Աբովյանից տեղափոխվեցի Աշտարակ: Բնակարանս եկեղեցուն այնքան մոտ է, որ կարողանում եմ մենակ գնալ տաճար: Թող Տերը օրհնի նրանց, ում միջոցով եղավ այս ամենը:

Ցանկությունս է ունենալ նաև ամբողջական Աստվածաշունչը, և որ Ղուկասի Ավետարանը լինի կույրերի համար նախատեսված բոլոր գրադարաններում ու դպրոցներում` հասանելի բոլորին:

Հիմա ինձ համար ընթերցում են Նոր Կտակարանը և Հին Կտակարանը: Այնքան շատ եմ հարցեր տալիս և ուզում լսել Աստծու խոսքը, որ մեր եկեղեցու Արամ սարկավագը Ձեր հոգածությամբ, պարո՛ն Գաբուճյան, ինձ համար ձեռք բերեց Ավետարանը` Բրայլյան գրով, որի մասին ես նախկինում չգիտեի: Ուզում եմ իմանալ` Բրայլյան գրով կա՞ն էլի հոգևոր գրքեր կամ ձայներիզներ:

Շնորհակալություն բոլորիդ, և փառք Աստծուն, որ ունեմ այս Գիրքը: Տեր Հիսուս Քրիստոսի սերը բոլորիդ հետ: Ամեն: