Գլխավոր | Մեր Ծրագրերը | «ՔԱՅԼՈՂ ԱՎԵՏԱՐԱՆ» Աստծու խոսքը սահմանամերձ գյուղերում

2004թ․Հայաստանի Աստվածաշնչային Ընկերությունը ձեռնարկեց «Քայլող Ավետարան» կոչվող ծրագիրը, որի նպատակն էր Աստծո Խոսքը Հիսուսի առակների միջոցով հասանելի դարձնել սահմանամերձ և երկրաշարժից տուժած գյուղերի բնակիչներին։ Այս ծրագրի առաջադրանքն էր մեծից փոքր համախմբել գյուղական համայնքը՝ մարդկանց հետ խոսելու Սուրբ Գրքի կարևորության շուրջ։ Այս ծրագրի իրականացման համար տարբեր տարիների հրատարակվեցին ծաղկաքաղ գրքույկներ, որոնք բովանդակում էին Հիսուսի առակները, ուսուցումներն ու հրաշագործությունները և Հիսուսի կյանքը՝ քաղված չորս Ավետարաններից։ Այնուհետև ամփոփ հրատարակվեց ծրագրի շրջանակում կատարված 12 այցերին համապատասխան 10 առակ, 1 բժշկություն և 1 հրաշագործություն՝ համապատասխան բացատրություններով ու խորհրդածություններով։ Ծաղկաքաղ այս գրքույկը կոչվում է «Քայլող Ավետարան», որը բաշխվում է ոչ միայն մասնակիցներին, այլ նաև գյուղի ընտանիքներին։ Յուրաքանչյուր գյուղում կատարվում է 12 այց, և տարին բաժանվում է երկու ժամանակահատվածի՝ մարտից մայիս և սեպտեմբերից դեկտեմբեր․ յուրաքանչյուր կիսամյակում հնարավոր է լինում այցելել 4 գյուղ։
Իբրև այս ծրագրի շարունակություն` գյուղերում բացվեցին կիրակնօրյա դպրոցներ։
2004-2020 թթ․ սույն ծրագիրը իրականացվել է 87 համայնքներում՝ Տավուշի մարզի 37 բնակավայրերում, Գեղարքունիքի մարզի Շորժայի և Ճամբարակի տարածաշրջանի 22, Սիսիանի՝ 2, Արարատի՝ 7, Վայոց Ձորի՝ 6, Արմավիրի՝ 5, Շիրակի մարզի Ախուրյանի տարածաշրջանի 6 և Արագածոտնի 2 բնակավայրերում։
2019թ․-ից ՀԱԸ Գլխավոր քարտուղար Եզնիկ արքեպիսկոպոս Պետրոսյանի յուրատեսակ նախաձեռնությամբ սույն ծրագրին կցվեցին կարպետագործության (մեծահասակների համար), սրբանկարչության և տիկնիկագործության (փոքրերի համար) միջոցառումներ հատուկ հոգեբանների մասնակցությամբ, որոնց նպատակն է արտթերապիայի միջոցով հոգեբանական և հոգևոր առավել դրական լիցք հաղորդել մասնակիցներին. սա միտված է աջակցելու մեկուսացված համայնքների բնակիչներին, որոնք հաճախ ապրում են հասարակական, պատերազմական և հոգեբանական դժվարին իրավիճակներում։ Ծրագրի ավարտին կանայք ներկայացնում են իրենց գործած կարպետները՝ աստվածաշնչական դրվագների և ազգային մոտիվներով, իսկ երեխաները կազմակերպում են տիկնիկային ներկայացում՝ աստվածաշնչյան հատուկ մշակված որևէ թեմայով։ Այս ծրագրի կարևորությունից ելնելով և աշխարհագրությունն ընդարձակելու միտումով 2020թ․ սկզբին Սյունիքի, Վայոց Ձորի և Տավուշի մարզերում կազմակերպվեցին հատուկ սեմինարներ թեմում ծառայող քահանաների պատրաստության համար, որպեսզի յուրաքանչյուր քահանա ինքը իրականացնի ծրագիրը իրեն վստահված գյուղերում։
2020թ․ COVID-19 աշխարհասփյուռ վարակը մի կարճ ընթացք դադար տվեց այս և այլ ծրագրերի, բայց ՀԱԸ աշխատակիցների ջանքերով հնարավոր եղավ ապահովել դրանց շարունակականությունը հեռավար կապով և ուսուցմամբ։
Անցած երկու տասնամյակներին այս ծրագրի ընթացքում բաշխվել է 30,000 օրինակ աստվածաշնչական գրականություն։
Նախանցյալ տարիներին հրատարակվել են․
• 2000 օրինակ «Հիսուսի առակները», Երևան, 2005,
• 2000 օրինակ «Հիսուսի առակները և հրաշագործությունները», Երևան, 2007,
• 2000 օրինակ «Հիսուսի առակները, հրաշքները, ուսուցումները», Երևան, 2008, 2010,
• 2000 օրինակ «Քայլող Ավետարան» (Ծաղկաքաղ Նոր Կտակարան), Երևան, 2014,
• 2000 օրինակ «Քայլող Ավետարան» (Ուսումնական Աստվածաշնչի բացատրություններով), Երևան, 2019։
2021թ․ ծրագիրը կենտրոնանալու է 4 մարզերում՝ Սյունիքում, Վայոց Ձորում, Արարատում և Գեղարքունիքում։ Գեղարքունյաց թեմի քահանաների համար նախատեսվում է վերապատրաստության մեկօրյա սեմինար և հեռավար ուսուցմամբ 4 սեմինար՝ սույն ծրագրում նրանց ներգրավելու նպատակով։ Ծրագրի ղեկավարի և հոգեբանների անմիջական մասնակցությամբ այն իրականացվելու է Վարդահովիտի (Վայոց Ձոր), Դարպասի, Բիլի (Սյունիք), Սոթքի (Գեղարքունիք) և Մասյացոտնի թեմի Ռանչպար, Սիս, Ուրցաձոր, Լանջառ գյուղական համայնքներում։ Այս առիթով հրատարակվելու է «Քայլող Ավետարան․Աստվածաշնչի պատգամը՝ ըստ Ուսումնական Աստվածաշնչի» գրքույկի 1400 օրինակ, և թողարկվելու է 1400 օրինակ տեսաերիզ՝ նույն գրքույկի ավելի հանգամանալից ներկայացմամբ՝ համայնքներին բաշխելու նպատակով։