Գլխավոր | Բլոգ | Լրահոս | Bibli՝O-ն Հայաստանում

Bibli՝O. այսպես է կոչվում Շվեյցարիայի Աստվածաշնչային ընկերության խմբագրակազմը, որը զբաղվում է ֆրանսալեզու հրատարակություններով։ Այս կազմակերպությունն իր հրատարակություններով սպասարկում և օժանդակում է ավելի քան 17 աֆրիկյան և ֆրանսախոս այլ երկրների՝ ներկայացնելով աստվածաշնչական գրականություն: Պատասխանատուները հանդիպում են տարեկան երկու անգամ՝ առաջինը Փարիզում, իսկ երկրորդը անդամ որևէ ընկերության երկրում:

Հայաստանի քրիստոնեական հարուստ մշակույթը նկատի ունենալով՝ ս.թ. հունիսի 23-28-ը նշյալ կազմակերպության տարեկան երկրորդ հանդիպումը տեղի ունեցավ Հայաստանում՝ Աստվածաշնչային ընկերության գրասենյակում: Աստվածաշնչային ընկերության բարձրաստիճան անդամները Հայաստան ժամանեցին հունիսի 23-ին: Այցելուների կազմում էին Էվա Թոմին և Կարլ Կլիմեկը՝ Շվեյցարիայից, Ժերմեն Մահյուն՝ Բելգիայից, Վեր. Ռենե Լևոնյանը, Էլզբեթ Շերրերը և Պասկալ Դյուբսը՝ Ֆրանսիայից, Գիյոմ Դյուվյոզարտը և Նելլի Սաֆարին՝ Կանադայից, և Մայք Բասուսը՝ Լիբանանից: Գարեգին Բ. Ամենայն Հայոց Կաթողիկոսի բարձր տնօրինությամբ նրանք հյուրընկալվեցին Մայր Աթոռ Սբ. Էջմիածնում:

Հաջորդ օրը՝ կիրակի, պատվիրակության անդամները ՀԱԸ ԳՔ Եզնիկ արք. Պետրոսյանի գխավորությամբ ներկա գտնվեցին Սբ. Պատարագի արարողությանը՝ Մայր Աթոռ Սբ. Էջմիածնի Տաճարում: Բելգիայի Աստվածաշնչային ընկերության ԳՔ Ժերմեն Մահյուն սքանչացած խոստովանեց. «Տաճարը, արարողությունը, մանավանդ երգեցողությունը իրոք ինձ բարձրացրին վեր, և զգացի այն, ինչ կոչում ենք հոգևոր ապրում»: Պատարագից հետո հյուրերն այցելեցին Գառնի և Գեղարդի վանքը:

Հանդիպում Ամենայն Հայոց Կաթողիկոսի հետ

Երկուշաբթի՝ հունիսի 27-ի կեսօրին, Bibli՝O-ի ներկայացուցիչները ՀԱԸ ԳՔ Եզնիկ Սրբազանի գլխավորությամբ այցելեցին Գարեգին Բ. Ամենայն Հայոց Վեհափառ Հայրապետին: Լիբանանի Աստվածաշնչային ընկերության ԳՔ Մայք Բասուսը կարճ հանդես եկավ զեկույցով՝ Վեհափառին ներկայացնելով նախ հյուրերին, ապա նշյալ կազմակերպության գործունեությունն ու գալիք ծրագրերը: Պատվիրակության տարբեր անդամները հանգամանալից պատասխանեցին Վեհափառ Հայրապետի մի շարք հարցերին: Շուրջ մեկ ժամ տևած հանդիպումից հետո պատվիրակները վերադարձան Երևան՝ շարունակելու ժողովական աշխատանքները:

Հանդիպմանը նախորդող օրերին Bibli՝O-ի կազմը հնարավորություն ունեցավ մասնակցելու ՀԱԸ կողմից իրականցվող տարբեր ծրագրերի:

Bibli՝O-ի երկօրյա նիստը ՀԱԸ գրասենյակում

Bibli՝O-ի տարեկան երկրորդ ժողովը տեղի ունեցավ Հայաստանում՝ ՀԱԸ գրասենյակում, հունիսի 27-28-ը: Երկու օրերի ընթացքում ժողովականները հիմնականում քննարկեցին կազմակերպության հետագա տարիների ծրագրերը՝ մասնավորապես կենտրոնանալով 2013 թվականի ծրագրերի վրա: