Գլխավոր | Բլոգ | Լրահոս | Քայլող Ավետարան

Վերջին տարիներին մենք հնարավորություն ենք ունեցել այցելել տարեկան 4 գյուղ։ Յուրաքանչյուր տարի այցելություններն ընդգրկել են տարբեր, մեկուսացած գյուղեր` Սուրբ Գրքի խոսքը ավելի շատ մարդկանց հասանելի դարձնելու համար։ Ծխական քահանաները նույնպես ընդգրկված են այս ծրագրում և կատարում են շաբաթական այցելություններ։ Ծրագրիը բաղկացած է երկու փուլից։

2011 թ. մարտից, ծխական քահանաների` Սարգիս քհն. Տերտերյանի և Արամ քհն. Միրզոյանի հետ համատեղ, ՀԱԸ հնարավորություն ունեցավ այցելելու 7 սահմանամերձ գյուղեր` Մովսես, Ներքին Կարմրաղբյուր, Նորաշեն և Չորաթան գյուղերը` Տավուշի մարզում, Երվանդաշատ, Բագարան և Վանադ գյուղերը` Արմավիրի մարզում։ 340 օրինակ «Հիսուսի հրաշքները», 600 օրինակ «Աստված խոսում է իր զավակների հետ», 260 գունազարդման գրքույկներ, 355 օրինակ 2011 թ. օրացույցներ են բաժանվել վերոնշյալ գյուղերում։ Հանդիպումներ ենք ունեցել ավելի քան 2500 մարդկանց հետ (ծնողներ, ուսուցիչներ, երիտասարդներ, երեխաներ, տեղական իշխանության ներկայացուցիչներ)։

Համաձայն իրենց վկայությունների, այդ այցելություններն ունեցել են իրենց ակնհայտ ազդեցությունը. ներգրավվածություն համայնքային կյանքում, հոգևոր և հոգեբանական վերելք և անձնական շփումների ակտիվացում, ցանկություն շարունակել ծրագիրն ամբողջ տարվա ընթացքում։ Գյուղացիներից շատերը իրենց տուն են հրավիրել և՛ քահանաներին և՛ ՀԱԸ ներկայացուցիչներին` միասին աղոթելու և օրհնելու իրենց տներն ու դաշտերը։