2018 Նոյ 03, ՇաբաթՍույն թվականի նոյեմբերի 2 - ին, զորամասային այցերի շրջանակներում, "Աստվածաշնչային ընկերության" ծրագրերի բաժնի տնօրեն Արշավիր Գաբուջյանը հյուրընկալվեց հայրենիքի արևմտյան սահմանը պաշտպանող զինծառայողներին: Տեղի ունեցավ հանդիպում զորամասի հոգևոր ակտիվներում ընդգրկված զինվորների հետ: Հանդիպման ընթացքում պրն. Գաբուջյանը զինծառայողներին ներկայացրեց Աստվածաշնչի դերն ու կարևորությունը քրիստոնյայի կյանքում, ինչպես նաև, Աստծո Խոսքի ապրեցումն այդ կյանքի ճանապարհին:
Զինծառայողներից սերժանտ Գ. Մուրադյանին հատկապես հետաքրքրում էր քրիստոնյայի կոչման և առաքելության առանձնահատկություններն ըստ Սուրբ Գրքի, իսկ մեկ այլ զինծառայողի հետաքրքիր էր, թե ինչպես կարելի է հետևել Աստծո Խոսքին և զերծ մնալ նախապաշարմունքներից և նյութապաշտական սովորություններից: Պրն. Գաբուջյանը սիրով պատասխանեց բոլոր զինծառայողների հարցերին, ապա ամփոփելով հանդիպումն ասաց, որ յուրաքանչյուր ոք պետք է կարդա Սուրբ Գիրքը, որը մխիթարության, քաջալերության, զորացման և դաստիարակության աղբյուր է: Որքան կարդում ենք, վերջնականապես չենք կարողանում նրա բոլոր մտքերի խորության մեջ թափանցել, որքան հարստանում ենք աստվածային խորին մտքերով, դարձյալ նորանոր հարստություններ ենք գտնում նրա մեջ և եթե սրտանց նվիրվում ենք նրան, մեր հոգևոր ամայությունը վերացնում ենք նրանով:
N զորամասի գնդերեց`
Գագիկ սրկ. Հակոբյան
02. 11. 2018 թ.